الكويت مركز مالي وتجاري

انا ما حب اقرا الجرايد لانها كلها اخبار تضيق الخلق , اليوم قلت اتصفح الجريدة لقيت خبر ونسني وحسيت ان البلد بخير .

الخبر يقول في مشاريع عملاقة بتحول البلد الى مركز مالي وتجاري فرحت والله قلت لازم تشوفونه معاي :)

بعد ما قريت وقفت شوي وفكرت بهالمشاريع خل ناخذهم واحد واحد , شلون بيساهمون بجعل الكويت

مركز مالي وتجاري ؟؟

مستشفى جابر ؟؟ المستشفى من ضروريات الحياة في ناس لازم في مستشفى !! شنو علاقة بالمركز المالي ؟؟؟

مشروع تطويرجزيرة بوبيان ( احنا خلصنا من تطوير الشوارع والموانئ والمنشآت النفطية اللي بالكويت واللحين بنبلش ببوبيان :)

طبعا انشاء القاعة الأميرية بالمطار وتجديد قاعة التشريفات وقاعة المؤتمرات في قصر بيان اهي الخطوات الاساسية في الطريق الى تحويل الكويت الى مركز مالي وتجاري , شلون اذا يونا قادة الدول وما عجبتهم القاعات الحالية شلون ؟؟

جسر الشيخ حابر , تبي اتطور الصبية وتسوي فيها مدينة سكنية لازم تسوي جسر , نرجع للسؤال شنو دور الجسر في المركز المالي ؟؟

مدينة جابر , مدينة سعد , مدينة الحرير ؟؟؟ مدن سكنية علشان الشعب يعني اذا كل الكويتيين صار عندهم بيوت راح يقدرون يحولون باقي الاراضي للقطاع التجاري وتصير الكويت مركز تجاري صح ؟ :)

مدينة جابر الرياضية , حتى لبنان عندهم مدينة رياضية لا واستضافوا كاس آسيا .

مادري الجرايد يقصون على العالم بهالخرابيط ولا في احد مسنعها لهم

باقي مشروع نسوا يذكرونه الجريدة ويعتبر من اهم نقاط التحول الى مركز مالي وهو تحويل قناتي سكوب وفلاش الى شركات مساهمة ويكتتب فيها جميع المواطنين :))