عندنا و عندهم

عندنا ولد عمره بين ال9 وال 10 سنوات ( كويتي ) مسافر مع اهله بالصيف , عند التفتيش في قاعة المطار لقى رجال الأمن ميدالية فيها سكين صغيرة بجيب الولد , طبعا صار استنفار وصرخوا عليه ليش يايبها معاك ومن اللوية اختبصوا اهله وانحرجوا جدام الناس فحطوا حرتهم بالولد وكانت راح تطوفهم الطيارة وصاروا سالفة لباقي الركاب يجزرون فيها الرحلة .

عندهم هم ولد تقريبا نفس العمر ( كويتي بعد ) بالتحديد بمطار فرانكفورت , عند التفتيش مرت العائلة كلها وقال موظف الأمن للولد انتظر شوي , يابله ورقة ملونة فيها صور للأغراض الممنوع صعودها الطيارة واللي مسموح فيها . وقاله حط لي دائرة على الشغلات الممنوعة .

اشر الولد على الممنوع ورجعها لموظف الأمن اللي طالعها وقاله ممتاز اجابتك صح عطاه الورقة وخلاه يروح مع اهله .

عند باب الطيارة يات المضيفة وقالت باشوف الورقة , ابتسمت وسألته ما دام انت شاطر وتعرف شنو ممنوع ليش شايل معاك سكين بجيبك ؟؟ الولد انحرج وقالها والله انا ناسي ان الميدالية فيها سكين وانا اسف :) ردت عليه : عطني الميدالية واذا وصلت الطيارة الكويت تعال وتلاقيها عندي :)

الولد اللي بمطار الكويت تبهدل من الشرطة ومن ابوه ويمكن طول السفرة كل يوم ينزف , والثاني تعلم شنو الممنوع وماراح ينساه طول عمره و يمكن اذا كبر وشاف البلد وحكومتها ومجلسها يهاجر ويعيش بالمانيا :)